Nagpirma sang Memorandum of Agreement (MOAs) ang City Government sang Victorias kag Negros Association of Chief Executives (Negros ACE) sa tunga sang Office of Civil Defense (OCD) agud pabaskugon ang pagpanghanda sang mga Local Government Units sa mga kalamidad.
Ini ang ginpatigayon sa Nature’s Village Resort subong nga adlaw Abril 11, 2025 nga ginpangunahan ni Victorias City Mayor Javier Miguel Benitez.
Una nga ginpirmahan sa kahiwatan amo ang MOA sa sa tunga sang City Government sang Victorias kag OCD nga tinutuyo nga pabaskugon ang bahin sang local disaster risk reduction kag management efforts nga ginakabig bilang isa ka daku nga tikang sang ciudad sa ginalauman nga disaster-resilient Victorias.
Kaupod ni Mayor Javi nga nagpirma sa MOA amo sanday OCD Administrator kag National Disaster Risk Reduction and Management Council (NDRRMC) Executive Director, Undersecretary Ariel Nepomuceno; Disaster Preparedness Service Director III Caesar Agnir Jr., kag Chief Science Research Specialist of UP Resilience Institute, Jose Abraham Ongkiko.
Nalakip man sa tinutuyo sang MOA ang pagpasangkad sang local capacity sa bahin sang disaster preparedness, emergency response, technical assistance kag pagpahanugot sa ciudad sang Victorias nga ma-access ang training programs, data resources nga makahatag sang effective planning kag community-based DRRM systems.
Sa mensanhe ni Undersecretary Nepomuceno, ginpahayag sini ang importansya sang pagpasangkad sang ihibalo sang mga LGU ilabi na sa nagapadayun nga aktibidad sang Bulkan Kanlaon.
Samtang, ang ikaduha naman nga MOA ang ginpirmahan sa tunga sang OCD kag sang Negros ACE nga ginapangunahan man ni Mayor Javi.
Sa idalum sang MOA, may kasugtanan ang OCD nga maghatag sang mga inisyatibo may angut sa pag-elevate sang DRRM standards sa mga ciudad sang kabanwahanan sang Negros Occidental.
Dugang pa, ang MOA ang magatutok man sa pagpasanyog sang collaboration, information sharing, kag capacity-building sa mga local leaders samtang ang OCD ang nagahatag sang nagakaigo nga technical kag operational support sa pagbulig sa mga programa sa pagpanghanda sa posible pagluntad sang kalamidad.
Suno kay Mayor Javi, magapabilin nga malig-on kag maga-isa ang Negros ACE leaders para sa kaluwasan sang mga Negrosanon.
Ginalauman man sini nga ang Negros ang mangin modelo sang local resilience.
Nagtambong sa nasambit nga kahiwatan amo sanday Civil Defense Deputy Administrator for International Engagements Carlos Bathan; NIR OCD Regional Director Donato Sermeno III;Councilor Audie Malaga, city department heads kag iban pa nga mga katapo sang disaster risk reduction.