Ginendorso na sang Office of the Civil Defense ang ginpangabay nga ayuda sang pila ka mga Local Government Unit (LGU) sa probinsya sang Negros Occidental para masustinar ang pagdumala sa mga apektado nga mga residente nga yara sa evacuation centers bangud sa padayon nga aktibidad sang Bulkan Kanlaon.
Suno kay Negros Island Region OCD Director Donato Sermeno III, na-endorso na ang ayuda apang nadelay lamang ini bangud nga ginplantsa pa ang nga procedures sa kun ano ang pamaagi sang pag-release sini
Ginklaro naman ni Sermeno nga ang ₱63M nga ayuda para lamang sang ciudad sang La Carlota kag may yara seperado nga request ang iban nga LGU.
Nagapati si Sermeno magaderecho na sa LGUs ang ayuda nga kun diin base sa dokumento, sa pagkaon magatupa ang pinakadako nga parte sini.
Sang nagligad lamang nga mga semana, nagsumite ang NIR OCD kaupod ang pila ka nga agency sang mga suggested sites para sa permanent evacuation kag relocation para sang mga apketado.
Ginpahayag naman ni Sermeno nga kun indi maaprubahan ang mga suggested site nga ila gin-endorso magapadayon ang pagpangita sang posible nga mga site para sa mga evacuees.