Sang una nga tiyempo, normal lang kun kabigon sang kadam-an ang pagpangbakol para disiplinahon ang mga kabataan. Pero sa panahon karon may gaubra pa bala sina? Si Asiye Kaytan ang naga-istar upod sa iya apo nga si Vural sa Topraklık, Denizli sa Southwestern Turkey. Humalin sang nagbulagay ang ginikanan sang bata, si Kaytan nga 85-anyos na ang naga-atipan kag naga-protektar sa iya apo — bisan pa batuk sa kaugalingon sini. Sang Agosto 9 sang nagligad nga tuig, pag-abot ni Vural halin sa trabaho, naglisensya ini sa iya lola nga magaguwa siya upod sa mga abyan. Tungod sang kahadlok para sa seguridad sang bata, ginpugngan siya sang lola, ginseraduhan pa ang puwertahan agod indi siya makaguwa. Sa tunga sang ila paglalisanay, ginpilit buksan ni Vural ang puwertahan, gani ginkuha ni Kaytan ang isa niya ka tsinelas kag ginhampak ang braso sang apo. Ginpangibabawan sang instincts ni Vural kag ginhampak niya ang iya lola sa ulo gamit ang cellphone. Bangud sang impact, nadugo ang ulo ni Kaytan, kag tungod sang kahadlok sang bata, nagtawag ini sang ambulansya. Wala nila nabal-an nga ang simple lang unta nga away pamilya mangin isa ka internasyonal nga balita. Wala sang isa sa ila nga nagpasaka sang reklamo batuk sa isa kag isa, pero nagsugid sila sa mga first responders kun paano nakuha ni Kaytan ang pilas sa ulo. Isa ka report ang ginpagwa sa Denizli State Hospital kag ginpasa ini sa lokal nga kapulisan. Gin-imbestigar ang duha, kag bisan klaro nga nag-ayo na ang ila relasyon, nagbukas gihapon ang korte sang kaso publiko kag ang Public Prosecutor’s Office nagsaka sang pormal nga reklamo batuk kay Kaytan. Suno sa prosekyusyon, ang tsinelas nga ginpanghampak ni Kaytan sa iya apo ginakabig nga “armas,” kag si Vural nag-akto lang sang self-defense sang ginhampak niya ang iya lola gamit ang cellphone. Gin-akusar man si Kaytan sang “ depriving a person of their liberty” sang ginserado niya ang balay kag wala ginpagwa ang apo. Ang ini nga kaso ang may kasarang nga silot nga 14 years nga pagkapreso. Sa isa ka interview, ginkwestyon ni Kaytan ngaa presuhon pa siya sa edad nga 80? Paano siya mabuhi didto labi na nga bag-o lang siya gin operahan kag daw indi na gani in maglakat. Dugang pa sini nga bangud lang sang tsinelas,ginpreso gid siya. Suno naman kay Vural, gunakasubo niya ang natabo sa iya lola bangud aminado man ini nga siya ang may sala. Pahayag sini nga wala niya ginreklamo iya lola pero ang gobyerno ang nagpasaka sang kaso.
