Ginbawi-an sang kabuhi ang isa ka Police personnel sang Bago City PNP matapos ini makabunggo sa utod nga kahoy kag nahulog sa kalog sa National Highway, Purok San Pedro, Barangay Napoles, Bago City pasado las-4 kaina sang aga, April 14,2025.
Ang biktima ang ginkilala kay Police Staff Sergeant Hero John Trayco, 36-anyos, kasado kag residente sang Purok Quarry Site sa nasambit nga barangay.
Sa interview sang DYHB kay Bago PNP Traffic investigator PSSgt. Ruel Ubas, ginpahayag sini nga nagabiyahe halin Barangay Lag-asan padulong Barangay Napoles ang biktima sang nadulaan ini sang control sa iya ginamaneho nga Honda XRM kag aksidente nga nahulog sa irrigation canal.
Ginhingagaw pa dala sa ospital ang biktima apang gindeklarar nga dead on arrival.
Base sa pagpangusisa sang DYHB RMN, natukiban nga naghalin pa sa Alumni Homecoming sa isa ka eskwelahan sa Bago City ang biktima.