Wala pa sang ideya si Mayor Rex Jalando-on kun san-o ma-release ang P63.097 million nga dugang nga pundo nga ginhingyo sini sa Palasyo sang Malacañang para sa mga kinahanglanon sang mga pumuluyo sang La Carlota City nga apektado sang paglupok sang Bulkan Kanlaon.
Sa interview sa alkalde, ginpahayag sini nga sang magpadulong sa ila ciudad si Office of the Civil Defense Administrator Ariel Nepomuceno sang nagligad nga semana, ginpaalinton sini nga aprubado kag pirmado na ang amo nga pundo.
Apang wala na makahibalo si Mayor Jalando-on kun ano ang proseso nga agyan sang pundo antes ini mapalab-ot sa ila nga ciudad.
Gamiton ang amo nga kwarta para sa mga kinahanglanon sang mga evacuees.
Sa pinakaulihi nga data nagikan sa Department of Social Welfare and Development, yara sa 327 families ukon 1,127 individuals ang evacuees sa La Carlota City.