Pagkatapos sang kapin tatlo ka dekada, isa ka dako nga reporma ang ipatuman sa licensure examination sang mga manunudlo agud mas magtutok sa ila nga espesyalisasyon.
Pinaagi sa joint memorandum circular nga ginpirmahan sang Commission on Higher Education (CHED) kag Professional Regulation Commission (PRC) sang nagligad nga semana, igapatuman ang separado nga exams base sa subject specializations.
Nahibaluan nga ini ang labing una nga natabo humalin pa sang 1996.
Umpisa Setyembre, magakuha sang separado nga licensure examination ang mga aspiring teachers sa elementary kag secondary education sa diin ang nasambit nga exam ang magatutok sa ila specialization.
Lakip diri ang English, Filipino, Mathematics, Science, Social Studies, Values Education, Technology and Livelihood Education, Technical-Vocational Teacher Education, Physical Education, kag Culture and Arts Education.
May lain man nga licensure exams para sa mga naga-specialize sa early childhood education kag special needs education, tinutuyo sini nga masiguro nga ang qualification sang mga manunudlo ang angay gid sa ila gintun-an kag gin-eskwelahan.