Igadul-ong na buwas nga adlaw, Mayo 6, ang mga official ballots nga pagagamiton sa Mayo 12 nga eleksyon sa mga City kag Municipal Treasurer’s Office sa palibot sang Negros Occidental.
Kahapon, Mayo 4, nagdungka sa Bacolod City ang barko nga nagdala sang mga balota kag gin-diretso ini sa hub sang natungdan nga logistics company sa Barangay Alijis.
Kaina, gin-segregate kag ginkarga ang mga ini sa mga trucks agud i-deliver sa mga city hall kag munisipyo sa palibot sang probinsiya buwas nga adlaw.
Ginpasiguro ni Provincial Election Supervisor Atty. Ian Lee Ananoria nga kompleto ang mga official ballots base sa ila nga initial count apang ini ang iga-verify sang natungdan nga mga election officers sa tion nga madul-ong na ini sa ila nga lugar.
Ginpadal-an na sang notisya ang mga political parties kag subong man mga watchers agud sila ang makatambong sa inspection sang official ballots kag paraphernalia.
Nahibaluan nga nadul-ong na sa nagkalain-lain nga voting centers ang mga automated counting machines kag sa maabot nga Myerkules, magapatigayon sang final testing and sealing (FTS) agud matsekyar ang accuracy sang mga ini.
Ginklaro naman ni Atty. Ananoria nga ang official ballots ang igadul-ong sa mga clustered precints sa mismo adlaw sang eleksyon magluwas na lamang kun may yara sang authority para sa early release sa Mayo 11 para sa malayo nga mga lugar.
Samtang, ginpasiguro ni Atty. Ananoria nga plastado na ang security plan para sa paghiwat sang piniliay.