Luyag tutukan ni 4th District Congressional Candidate Engineer Lea Delfinado ang mg sektor nga iya ginapatihan wala maayo nasapak sang gobyerno.
Sa interview sang DYHB kay Delfinado, ginpahayag sini nga madamo pa sang mga kulang sa kwatro distrito rason man nga nagsulod ini sa politika pagkatapos sang iya pagretiro sa pagserbisyo sa National Government.
Suno kay Delfinado, isa sa iya mga luyag hatagan sang atensiyon amo ang health services sa fourth district pinaagi sa paghatag sang libre nga anti-rabies, anti tetanus kag iban pa nga mga mayor nga pagkinahanglanon sang mga tawo para sa ikaayong lawas.
Nakita man ni Delfinado ang kakulangon sang mga imprastraktura kaangay sang farm to market roads, mga taytay nga kawayan sa mga suludlon nga mga barangay.
Suno kay Delfinado, simple lang ini nga mga butang apang kulang sa representasyon agud mapangitaan sang pamaagi agud masolusyunan.
Samtang sa sektor sang agrikultura, gusto man ni Delfinado iduso ang Solar Irrigation ilabi na sa Bago City.
Suno sa iya, isa ini ka alternative kun mag mala ang irigasyon.
Kaysa mag gasto ang nga mangunguma sa krudo para sa mga tasok, mas makatipid ang mga ini kun may solar irrigation na.
Dugang pa sini nga madamo na sang mga lugar diri sa pungsod ang nag-avail man sang ini nga plano kag suno kay Delfinado, political will lang ang kulang agud matipigan ang mga mangunguma.
Sa pihak nga bahin, ginpakigbahin man ni Delfinado ang iya nangin kontribusyon sa paghikot sang disensyo para sa Panay-Guimaras-Negros (PGN) Bridge sadtong director pa ini sang Department of Public Works and Highways (DPWH) Bureau of Design.
Suno kay Delfinado, ang ini nga proyekto ang isa sa mga sabat agud mapasanyog ang ekonomiya sang 4th district bangud nga sa banwa sang Pulupandan magalapos ang ini nga taytay.
Iban pa sa mga plano nga ginpakigbahin sini kun siya ang mangin palaron magdaog bilang 4th District of Negros Occidental Representative, amo ang paghikutar sang permanent evacuation site para sa mga apektado sang bulkan Kanlaon.
Si Delfinado nga nangin Assistant Secretary man sang Department of Human Settlements and Urban Development (DHSUD) ang may plano nga gamiton ang iya nahibaluan kag expertise sa pagduso sang programa nga makahatag sang puluy-an sa mga residente sang distrito nga nahamtang malapit sa Kanlaon.