Nag-abot na sa ciudad sang Bacolod ang latest allocation sang food commodities sa idalum sang 14th cycle sang Supplementary Feeding Program (SFP) sang Bacolod Department of Social Services and Development (DSSD) kahapon nga adlaw, Mayo 27, 2025.
Ang nasambit nga mga pagkaon ang gindeliver sa Barangay Taculing kag natalana nga iga-distribute sa mga kabataan sa nagkalain-lain nga day care centers sa ciudad.
Nahibaluan nga ang SFP ang isa ka inisyatibo sang gobyerno nga nagatuyo sa pagpauswag sang nutritional status sang mga kabataan pinaagi sa paghatag sang dugang nga pagkaon kaupod sang ila regular nga ginakonsumo.
Ginasuportahan man sini ang mas malapad nga mga katuyuan may angut sa Early Childhood Care and Development (ECCD) sa pagpasanyog sang ikaayong lawas kag kaayuhan sang mga kabataan.