Gina-alegar inconsistent ang impormasyon nga ginahatag sang lalaki nga upod sang biktima nga nagtaliwan sa nagluntad nga gina-alegar abduction kag pagpangluthang sa banwa sang Ilog sang tinalikdan nga Mayo 27.
Ang biktima nga nagtaliwan ang ginkilala nga si Kirt Lobaton, 24-anyos, residente sang Barangay Matab-ang sa ciudad sang Talisay.
Samtang ang naka-survive sa amo nga hitabo ang una nga nagpakilala nga si Nico Fajardo kag pakaisa sang nagtaliwan, apang nadiskubrihan nga ang iya matuod nga pangalan amo si Nicole Java kag abyan lamang sang biktima.
Base sa rebelasyon sang isa sa mga himata sang nagtaliwan, ginpahayag ni Java sa kapulisan nga natabo ang gina-alegar abduction sa Brgy. Binicuil sa Kabankalan, apang sa iya naman nakuha nga impormasyon sa abyan ni Lobaton, natabo ang amo nga abduction sa ciudad sang Bacolod, malapit sa South Bound Terminal kun sa diin sila ang nagikan sa Cebu.
Ginkatingalahan man sang mga ini, kun ngaa kinahanglanon ni Java nga magpakilala bilang si Fajardo kag pakaisa sang ila himata.
Duda man sila kun ngaa tuman ka hugot sang paghigot sa mga kamot ni Lobaton gamit ang cable tie, kag halog naman ang kay Java, kag sa pito ka tiro sang suspek kay Java, wala ini sang pilas nga naangkon.
Nagapati ang himata ni Lobaton nga possible planado ni Java ang amo nga hitabo, kag possible may kahilabtanan sa kamatayon sang biktima.
Dugang pa, nagpakilala si Java, nga ini ang gina-alegar asset sang gobyerno, apang wala ini sang kumpirmasyon nagikan sang kapulisan.