Wala na sang lugar sa probinsiya sang Negros Occidental nga nagapabilin nga red zone ukon may kaso sang African Swine Fever (ASF) sa mga baboy.
Ginkumpirmar ni Negros Occidental Provincial Veterinary Office Officer-in-Charge Dr. Yasmin Tan nga sa pinakaulihi nga update sang Department of Agriculture, wala na sang red zone sa probinsiya matapos nga na-upgrade sa pink zone ang Bacolod City kag Escalante City.
Sa kabug-usan, may 11 ka mga lugar sa probinsiya nga yara sa pink zones nga ginalakipan sang Kabankalan City, Hinigaran, La Castellana, Pulupandan, San Carlos City, San Enrique, Silay City, Victorias City kag Valladolid.
Sa pihak sang pag-upgrade, suno kay Dr. Tan, indi sa gihapon makabig nga ASF-free ang Negros Occidental.
Ang pink zones ang kinahanglan nga mag-apply sa Department of Agriculture para sa sentineling agud mahatagan sang sentinel pigs nga paga-obserbahan sa sulod sang 40 ka adlaw kun sila ang maga-positibo ukon maga-negatibo sa ASF.
Samtang, gikan sa pink zone, na-upgrade naman sa yellow zones ang Bago City kag Sagay City.
Ang mga baboy sa yellow zones ang kinahanglan nga kuhaan sang blood samples tagsa 30 ka adlaw kag kinahanglan nga magpabilin sila nga hilway sa amo nga balatian tubtob nga mapaidalom sa Dark Green ukon ASF-free.