Isa ka babayi nga Chinese ang nag-antos sang tuman nga kakulangon sa vitamin D bangud sang sobra nga paggamit sini sang sunscreen rason man nga nagkala-bali ang tul-an sini samtang nagaligid sa katre. Suno sa mga doktor sa XinDu Traditional Medicine Hospital sa Chengdu, China, isa ka talagsaon nga kaso ang natabo sa 48-anyos nga babayi nga nagkala-bali ang iya tul-an sa simple lang nga pagligid sa katre. Ginpahayag ni Dr. Long Shuang, nga ang mga eksaminasyon sa ospital ang nagpakita nga ang lebel sang vitamin D sang babayi nangin sobra ka nubo, nga amo ang nagpagabok sang iya tul-an kag nagresulta sa osteoporosis. Sa mas maid-id nga imbestigasyon, nahibaluan nga nagalikaw ini pirme sa adlaw halin pa sang pagkabata. Wala man ini nagsuksok sang bayo nga may nubo nga manggas, kag pirmi siya naga sunscreen kada maggwa. Ginapatihan nga ang iya kaso ang resulta sang sobra nga paggamit sang sunscreen kag pagkagabok sang tul an. “Indi ini maayo para sa lawas,” suno kay Jiang Xiaobing, direktor sang Department of Orthopedic Spine Surgery sa Second Affiliated Hospital of Guangzhou Medical University. “Ang tanan naton nga tul-an ang naga bag-o kada napulo ka tuig, pero pag-abot sa edad nga 30, nagakabuhinan na sang kapin 0.5 tubtob 1% ang bone mass ka tawo. Ang kakulangon sang calcium sa lawas ang makaapekto gid man sa tul-an suno sa doktor.
