Nagpagwa na sang iya statement si 3rd district of Negros Occidental Congressman-Elect Javi Benitez sa isyu nga ginapangatubang sang iya mga ginikanan nga sanday Bacolod City lone district Congressman-elect Albee Benitez kag Nikki Benitez may angut sa nag-leak nga kopya sang complaint affidavit sa “Anti-Violence Against Women and Their Children Act of 2004,” kag pagka ulamid sang isa ka personalidad sa problema sang pamilya.
Suno kay Mayor Javi, indi niya na tani luyag pa mag-intra apang indi niya man ini malikawan karon nga naglapta na ini sa social media.
Pahayag pa sini nga ang mga tawo nga nakahibalo sang bug-os nga istorya ang nagahipos lang—wala sa headlines sang balita kag wala man naga-post.
Ayo sang alkalde nga tani mag-intyendihanay na ang ila iloy kag amay, indi bilang “couple” kundi bilang ila mga ginikanan sang iya manghod nga si Bettina.
Dugang pa sini nga kabay pa makakita sila sang insakto nga paghigugma, ang indi matakos sang kwarta, status kag imahe, kundi pinaagi sa respeto, pagpalangga-anay kag matuod nga pagbinuligay sa pagpangabuhi.
Ginpasalamatan man ni Mayor Javi ang tanan nga mga tawo nga nagpalab-ot sang mensahe, nagpangamusta kag nagpangamuyo sa ini nga pagpanghangkat sa ila pamilya.
Nagasalig man ini nga tani sa ulihi, ila pa sarang makay-o ang sitwasyon.
Sa karon, luyag na lang sini mag-focus kag mag-invest sang iya “energy” sa iban pa nga butang para sa ikaayo sang pungsod kaysa sa magpaapekto sa mga tsismis, fake news kag paid drama.
Suno pa kay Benitez, sa ulihi, indi views, likes kag kwarta ang talaksan sang isa ka tawo kundi ang iya tagipusuon.
“Let’s choose to be kind,” sambit pa sini.