Indi makabig nga kaso sang monkey pox ang rashes kag bitog-bitog sa panit sang duha ka mga persona sa probinsya sang Negros Occidental suno sa Provincial Health Office (PHO).
Ginpahayag ni Provincial Health Officer Dr. Girlie Pinongan nga may duha ka pasyente sila nha gin-imbestigahan bangud sang kondisyon sang ila nga panit.
Isa diri ang 1-year old nga bata nga taga-Pontevedra kag gindala sa Don Salvador Benedicto Memorial District Hospital sa La Carlota City bangud sang rashes sa liog.
Samtang, may isa man ka bus driver ang gindala sa Tabugon Hospital sa Kabankalan City bangud sang kondisyon sang iya panit nga kapin isa ka bulan na sini nga ginabatyag.
Suno kay Pinongan, base sa nakita sini nga pictures kag sa assessment sang mga chief-of-hospital sang nasambit nga mga bululngan, indi mpox ang ginabatyag sang nasambit nga mga pasyente.
Apang ginklaro man sini, nga indi nila madeklarar nga negatibo sa mpox ang nasambit nga mga pasyente tubtob nga indi sila makuhaan sang specimen agud mausisa.
Sa pihak nga bahin, nagapabilin nga prayoridad sang mga health facilities, hospitals kag local government units sa Negros Occidental ang mga pasyente nga may mga lesions ukon bitog-bitog sa lawas.