Makabig pa nga Monkey pox free ang probinsya sang Negros Occidental sa karon base sa assessment sang Department of Health (DOH).
Sa interview sang DYHB kay DOH Undersecretary Mary Ann Maestral, ginpahayag sini nga padayon ang ila panawagan sa publiko nga indi magka-alarma sa mga una na na-report nga positive cases sang Mpox sa Iloilo City kag Iloilo Province.
Suno kay Maestral nga ang duha ka kaso ang naka-recover na kag nakapatigayon naman sang contact tracing kag na-isolate na ang mga ini.
Pasiguro sini nga wala na sang dugang pa nga kaso nga nabalhag sa Iloilo.
Paathag ni Maestral nga ang pinaka makahalalit nga sahi sang Mpox amo ang 1B nga type sang virus.
Ang sahi sang Mpox nga nagatuhaw karon sa Pililipinas amo ang Clade 2 nga amo naman ang makalaton pinaagi sa skin to skin contact kag pagpakighilawas.
Panugyan ni Maestral nga kun may lesion ang isa ka tawo, maglikaw na lang sa pagtandog.
Dugang pa sini nga may naga-offer na nga vaccine sa Pilipinas apang kinahanglan pa ini imbestigahan sang DOH.