Isa ka rheumatologist halin sa Texas ang ginsentensyahan sang 10 ka tuig nga pagkapreso bangud sang ginaalegar health care fraud scheme kaangay sang pag-diagnose sang mga healthy nga pasyente nga may may lala nga balatian kag nagakinahanglan sang mahal kag delikado nga treatment. Si Jorge Zamora-Quezada, M.D. sang Mission, Texas, ang ginpamatbatan nga guilty sa sa several counts of health care fraud. Ginsentensyahan siya sang 10 ka tuig nga pagkapreso kag 3 ka tuig nga supervised release. Nahibaluan nga sa sulod sang pila ka tuig, gin-diagnose ni Dr. Zamora-Quezada ang iya nga pasyente nga may chronic disease apisar healthy ang mga ini agud lang nga maka-charge sila sang bayad para sa mga tests kag treatment. Base sa ebidensya nga ginpresentar sang mga piskal, ang iya scheme naglakip sang sobra $118 milyon nga peke nga claims kag sobra $28 milyon ang nabayad sang mga insurance companies, nga amo ang naghatag sa iya sang manggad kag maluho nga pangabuhi. Nasarangan sini magbakal sang 13 ka properties, jet, kag Maserati GranTurismo. Suno kay Matthew R. Galeotti sang Criminal Division sang U.S. Justice Department, “Gintustusan ni Dr. Zamora-Quezada ang iya maluho nga kabuhi sulod sang duha ka dekada pinaagi sa pag-traumatize sang iya mga pasyente, pag-abuso sang iya mga empleyado, pagsugid sang kabutigan sa mga insurance, kag pagpangawat sang kwarta sang mga pumuluyo.” Sa iya trial, pila ka rheumatologists halin sa Texas ang nagpamatuod nga nakita nila ang mga pasyente nga una gin-diagnose ni Zamora-Quezada nga may rheumatoid arthritis, pero wala man sang amo nga kondisyon kag mas lala pa bangud ginhatagan sila sang mabaskog kag delikado nga bulong nga may posibilidad nga maka-utas sang kabuhi sang pasyente. Ang iban sa ila nakaeksperyensya sang stroke, pagkadunot sang panga, pagkakalbo, diperensya sa atay, kag kasakit sa lawas nga indi ma intendihan. Bangud sini, si Jorge Zamora-Quezada kinahanglan magserbisyo sang 10 ka tuig sa prisohan kag 3 ka tuig nga ginamonitor nga release. Ginmanduan man siya nga bayaran ang $28,245,454, lakip na ang iya 13 ka real estate properties, jet, kag luxury cars.
