BACOLOD CITY- Pilason ang anay preso nga gina-alegar nagbato sa katapo sang kapulisan sang Bacolod City Police Station 2 matapos nga gintiro sa Barangay Balinday Barangay 2, pasado las-10 sang aga, Hunyo 3.
Ang pilason ang ginkilala nga si alias “Chong”, 27-anyos, kag residente sa amo nga lugar.
Base sa ginpahayag ni Police Captain Genus David, Deputy Chief sang Police Station 2, nakabaton sang report ang estasyon angot sa isa ka lalaki nga may bitbit sang armas-luthang nga caliber 45 pistol sa kilid sang dalan.
Sa pagpadulong sang kapulisan sa lugar, gilayon nga nagdalagan si Chong pasulod sa footwalk rason nga ini ang ginlaot sang awtoridad.
Nahibaluan, una nga nagpalupok si Chong, rason nga ini ang ginbalusan tiro sang mga katapo sang kapulisan.
Nakaagom sang pilas sa kamot kag abaga si Chong tuga sang pagpaniro.
Suno kay David, sa inisyal nga impormasyon, anay preso si Chong sa kaso nga murder kag ini ang imbolbado sa pila ka mga shooting incident sa ciudad.
Sa karun yara sa ospital si Chong para sa nagakaigo nga pagbulong.