PROVINCIAL CAPITOL – Nagpatigayon na sang site validation sa mga katubuhan nga gin-atake sang red-striped soft scale insects ang gintukod nga Inter-Agency Task Force.
Ginpahayag ni Department of Agriculture Negros Island Region Regional Executive Director Engr. Jose Albert Barrogo nga nagpadulong sa northern Negros, particular sa Victorias City, ang task force agud lantawon ang sitwasyon sang mga kampo sang tubo.
Kahapon, nag-abot na ang mga tiglawas sang Bureau of Plant Industry Central Office nga may dala nga mga pesticides kontra sa RSSI kag ginalauman nga masugdan na buwas nga adlaw ang pagpang-spray sang pesticide.
Suno kay Engr. Barrogo, ginahulat sang DA ang rekomendasyon sang Sugar Regulatory Administration kun sa diin nga lugar una patigayunon ang spraying operation.
Samtang, sa ginhiwat nga meeting sang Interg-Agency Task Force kahapon, ginrekomendar sang SRA ang pagpatigayon sang quarantine ukon pag-restrict sang pagpaguwa kag pagpasulod sang patdan agud maibetar ang paglapta sang RSSI.