PROVINCIAL CAPITOL – Pagahayluhon ni Governor Eugenio Jose Lacson ang mga local government units sa Negros Occidental nga magpadala sang ila mga scholars padulong sa Australia sa idalom sang Study Now, Pay Later Program sang Provincial Government.
Sang damlag lang, 10 sa mga ini ang nag-graduate – lima sa commercial cookery kag lima sa early childhood care – nga lunsay outstanding students kun sa diin isa ang naghatag pa sang speech sa ila nga graduation.
Suno sa gobernador, nagpabutyag ang Negrense scholars nga nangin “life-changing” ang ila pagtuon kag pagtiner sa Australia kun sa diin isa sa ila ang nangin citizen na samtang ang iban ang permanent residents.
Sa karon, may 17 karon ka mga Negrense scholars nga kabahin sang first kag second batches nga ginpadala sa Australia.
Plano sang Capitolio nga magpadala sang dugang nga 10 scholars sa madason nga tuig kag iya hayluhon ang mga LGUs nga mag-sponsor sang isa ka estudyante.
Nahibaluan nga sa idalom sang Study Now, Pay Later Program sang probinsiya, maga-eskwela sang duha ka tuig sa Australia ang scholar kag ang grant ang iya pagabayaran sa sulod sang lima katuig nga wala sang interest.
Ginalantaw nga nagalab-ot sa P1 million ang magasto sa kada scholar.
[Capitol Photos]