Magasugod na sa pagbaligya sang tag P20 kada kilo sang bugas ang ciudad sang Bacolod sini nga Huwebes, June 5,2025.
Sa interview sang DYHB kay Department of Agriculture- Negros Island Region (DA-NIR) director Albert Barrogo, ginpahayag sini nga inisyal nga iga-roll out sang ciudad ang 6,000 ka mga sako sang bugas agud ibaligya sa tag-20 pesos kada kilo.
Nahibaluan nga P7 million ang gintalana nga budget sang ciudad para sa inisyal nga roll out sini sa diin sila ang magabakal sang bugas sa National Food Authority (NFA) kag magabaligaya sini sa mas barato nga presyo.
Suno kay Barrogo, yara lang sa 9,000 bags sang bugas ang naka-stock sa warehouse sang NFA diri sa Bacolod rason nga limitado lang ang mapagwa nga bugas sa karon.
Dugang pa sini nga sa ti-on nga mapagwa na ang stocks sa warehouse, magasugod naman sa paggaling sang bag-o nga palay ang NFA agud mangin supisyente ang supply sini.
Ang challenge karon para sa NFA amo ang capacity sang warehouse.
Paathag sini nga ang mga highly urbanized cities lamang kag ang provincial government ang sarang makabaligya sang bugas.
Kun tuyo sang mga LGU sa Negros Occidental magbaligya sang tag P20 per kilo nga bugas, sila na dapat ang maga-coordinate sa Provincial Government.
Sa pihak nga bahin, magapatukod naman sang 3 hectares nga kadakuon sang NFA warehouse ang NIR sa ciudad sang Himamaylan agud masiguro nga dako ang masarangan ma-stock nga bugas sang ahensya.