BACOLOD CITY- Natalana nga magapangatubang sang kaso nga homicide ang suspek nga nagbuno sa gina-alegar kawatan sang tinalikdan nga Hunyo 1 sa Purok Baybayon, Barangay Banago sa ciudad sang Bacolod.
Ang biktima ang ginkilala nga si alias “Mark”, 33-anyos, residente sang ciudad sang Cadiz apang temporaryo nga nagatinir sa Brgy. Banago, samtang ang suspek amo si alias “Roy”, 31-anyos, kag residente sang ciudad sang Kabankalan.
Ginpahayag ni Police Station 3 Commander Police Major Rondyl Tapang, nagluntad ang insidente sang gina-alegar nagsaka ang biktima sa truck kun sa diin nagapahuway ang suspek, kag tuyo kuntani kuhaon ang cellphone ni Roy, kag didto nagsugod ang komusyon sa tunga sang duha.
Gilayon nagkuha sang kutsilyo ang suspek kag ginbuno ang biktima sang makapila ka beses, kun sa diin nakaagom ini sang pilas sa iya likod, tiil, kag kamot nga gintunaan sa iya kamatayon.
Dugang pa ni Tapang, nagpalagyo pa ang suspek matapos ang ginhimo ang krimen, apang pila ka minuto ang makaligad gilayon man ini ang nagsurrender sa mga katapo sang kapulisan.