Magaupod sa Nationwide rally protest kag untat biyahe ang pila ka mga transport groups diri sa ciudad sang Bacolod sini nga Huwebes, June 5,2025.
Sa interview sang DYHB kay Bacolod Aliance of Commuters Operators and Drivers Inc. (BACOD) / Manibela President Rudy Catedral, ginpahayag sini nga magaupod sa ila panawagan sa pag-renew sang ila franchise ang United Negros Drivers Operators (UNDOC)- Piston kag Kabacod Negros Transport Coalition (KNETCO).
Suno kay Catedral, kapin 800 ka mga units ang magaupod sa ila sa nasambit nga rally kag majority sa mga ini amo ang mga drivers kag operators sa idalom sang BACOD.
Maga-umpisa las-6 sang aga rally kag magatakop ini las-10 sang gab-i sa idalom sang flyover sa barangay Bata kag Magsaysay.
Paathag ni Catedral nga “initial movement” lamang nila ini.
Nagapati ang grupo nga kun mag-untat biyahe sila, mabatyagan gid ini sang mga commuters, isa ka pamatuod nga kulang pa ang pwersa sang mga modern jeep diri sa ciudad.
Dugang pa sini nga indi pa karon ang tion para i-phaseout sila sa mga dalanon kag ang dapat himuon sang mga yara sa pwesto amo ang itugutan sila maka-renew sang ila mga prangkisa.
Wala man ang nga ini nagapati sa panindugan sang Land Transportation Franchising and Regulatory Board (LTFRB) nga yara na sa 90% ang modern jeeps sa Bacolod bangud nga indi man ini mabatyagan sang mga commuters kag wala man sila sang datus nga ipakita sa pagpamatuod sini.