BACOLOD CITY- Magapangatubang sang patong-patong nga kaso ang anay preso nga natiruhan sang kapulisan sa Purok Balinday, Barangay 2 sa ciudad sang Bacolod kahapon nga adlaw, Hunyo 3.
Ang anay preso ang ginkilala nga si alias “Chong”, 27-anyos, kag residente sa amo nga lugar.
Base sa pahayag ni Police Station 2 Commander Police Major Eugene Tolentino, ginapreparar sa karun sang kapulisan ang kaso nga paglapas sa Republic Act 10591 ukon Comprehensive Firearms and Ammunition Regulation Act, COMELEC gunban, kag illegal possesion of explosives batok kay Chong.
Nahibaluan nga narekober kay Chong ang caliber 45 pistol nga iya gingamit sa una nga pagpaniro sa nga kapulisan samtang ini ang tuyo kuntani dakpon bangod sa paghupot sang armas, nakuha man sa iya nga bag ang isa ka hand grenade.
Narekober man sa crime scene ang duha ka deformed fired bullet, duha ka magazine, pito ka live ammunition, duha ka FCC sang caliber 45, kag duha ka FCC sang caliber 9mm.
Dugang pa ni Tolentino, ila man ginapreparar ang kaso nga attempted homicide ukon frustrated homicide batok kay Chong, apang depende ini sa evaluation sang prosecutor.
Sa karun, nagapabilin nga yara sa ospital si Chong bangod sa naagom nga pilas sa kamot kag abaga.