Madamo nga mga pamaagi kun paano mag-atubang sa imo anay karelasyon matapos ang isa ka masakit nga breakup. May iban nga naga-hibi antis matulog kada gab-i, may iban nga naga-travel kag nagapangita sang kalipay, kag may iban man nga kadasig lang maka move-on. Apang may isa ka babayi halin sa China nga nagdesisyon nga siya mismo ang magbuhat sang aksyon tungod kay ang iya ex-boyfriend wala man lang nagpakita sang emosyon pagkatapos sang ila pagbulagay. Suno sa Malay Mail, ang babayi nga si Zhao, halin sa Shandong, China, nagsend sang isa ka toneladang sibuyas sa iya ex para tudluan ini sang leksyon tungod kay wala siya ginhibian matapos sila magbulagay. Base sa Chinese portal nga The Paper, nagsiling si Zhao nga ginhatag niya ang “regalo” tungod kay daw wala lang sa lalaki ang ila nangin break-up. Ginsiling pa nga si Zhao ang naghibi sa sulod sang tatlo ka adlaw pagkatapos sang ila pagbulagay, kag agud mapa-hibi man ang iya ex, ginpadal-an niya ini sang sibuyas nga may specific instruction nga ibutang ini sa atubang sang balay sang lalaki kag indi pag-ibalik sa sender. Nagpadala man si Zhao sang isa ka sulat kaupod sang iya regalo para siguruhon nga maghibi ang iya ex-boyfriend. Nakasulat diri nga “Ex! Tatlo ka adlaw ako nga naghibi, subong imo naman nga tion nga maghibi!” Siyempre, pareho sang ginalauman, ang iya ex-boyfriend nga ginkilala lamang nga kay Si, ang wala gid naghibi bisan pa sa ginbuhat ni Zhao. Kag para dugangan pa ang kasakit, ginpahayag ni Si sa balita nga ginbaligya niya ang mga sibuyas kag nakabaton siya sang 1,000 yuan bilang baylo.
