Padayon nga gina-monitor sang Bureau of Plant Industry (BPI) ang halit sang Red Striped Softscale Insect (RSSI) sa mga katubuhan sa Negros Occidental.
Sa interview sang DYHB kay BPI Manager Jenauh Job Jamili, ginapahayag sini subong nga adlaw, ila ginalibot ang banwa sang Murcia nga una na nareport nga 18 ka mga barangay sini ang nahalitan na sang RSSI.
Base sa assessment sang opisina, ila nakita nga ang katubuhan sang Victorias City ang tuman nga naapektuhan sang peste. Nahibaluan nga sa nasambit man nga ciudas una na-monitor ang presensya sang RSSI sa mga tubo.
Sa karon, hugot nga gibadumilian sang BPI ang pagpasulod kag pagpagwa sang mga planting materials diri sa Negros Occidental agud ma-contain ang paglapta sang mga peste.
Base sa pagtuon, nahibaluan nga masami nagapameste ang RSSI sa mga hilamon kag mais apang ang ila paborito amo ang dahon sang tubo.
Suno kay Jamili, mas makahalalit ang RSSI kun ipaanggid sa army worms bangud nga dasig ini maglapta kag magdamo.