All PostsBACOLOD CITY- Akto nga nadakpan sang Negros Power ang senior citizen nga lalaki nga gina-alegar nagapang-manipyular sang kontador ka kuryente sa Purok Paraiso, sa isa ka subdivision sa Brgy. Estefania sa ciudad sang Bacolod, pasado las-9 sang aga, Hunyo 4.
Ang suspek ang ginkilala nga si alias “Ray”, 63-anyos, residente sa amo nga lugar.
Ginpahayag sanday Leo Arimas kag Edwin Montemayor sang Negros Power- System Loss Reduction Program, samtang sila ang nagapatigayon sang saturation inspection, akto nga nakita si Ray nga may ginakuti sa iya kaugalingon nga kontador nga nahamtang sa sulod sang ila puluy-an.
Naglaom ang mga empleyado sang Negros Power nga natiyempuhan nga yara ini sila sa lugar nga magapangayo sang bulig ang suspek angot sa iya kontador, apang wala ini nagpalapit sa ila.
Ginapatihan nga ang pagmanipyular ni Ray sang ila kuntador, ang mangin isa ka rason agod indi mangin tuman kadako sang ila nga bill sa kuryente.
Sa karun ang suspek ang yara sa Police Station 4 kag natalana nga magapangatubang sang kaso nga paglapas sa Republic Act No. 7832 ukon “Anti- Electricity and Electric Transmission Lines/ Materials Pilferage Act of 1994.
Nagapanawagan ang Negros Power sa kun sin-o man ang nagabuhat kaangay sini nga buluhaton nga untaton na ini bangod kun sila ang akto nga madakpan, indi mag duha-duha ang electricity provider nga magpasaka sang kaso batok sa mga ini.