Nagpaathag ang pamunuan sang Corazon Locsin Montelibano Memorial Regional Hospital (CLMMRH) angut sa mahigko nga pasilidad kasunod sang social media post sang isa ka iloy sang duha ka mga pasyente.
Sa statement nga ginpaguwa ni Dr. Joan E. Cerradda, Medical Center Chief III sang CLMMRH kahapon, Hunyo 8, ginpasalamatan sini si Cayla Mitch Tecson sa iya nga ginhimo pagpabutyag sa sitwasyon sang mahigko nga pasilidad bangud diri makita ang mga dapat pa nga i-improve sa hospital.
Madumduman nga sang nagligad nga semana, nag-post si Tecson sang litrato sang pasilidad sa regional hospital sa diin gin-isolate ang iya duha ka mga kabataan nga may yara sang hand, foot and mouth disease.
Apang bangud sang mahigko nga hulot nga ginbutangan sa ila, naguwa ang mga ini sa CLMMRH kag nagsaylo sa iban nga hospital.
Sa statement sang hospital, las-11 sang udto nag-abot ang pamilya Tecson sa hospital, kag sadto nga tion, may 83 na ka pasyente ang Emergency Room (ER), nga lapaw na sa 68 beds capacity sini.
Ang duha ka bata ni Tecson, ang gin-asses bangud sang potential nga infectious rashes kag ginrekomendar para sa isolation. Apang puno na ang pediatric isolation area, gani temporaryo nga ginbutang sanday Tecson sa decontamination room.
Ang cot ukon ang kama nga makita sa litrato nga kuha ni Tecson, ang bag-o lang man ginbayaan sang isa ka pasyente, suno sa hospital. Nahangpan sang hospital ang posible nabatyagan sang pamilya sang nakita ang sitwasyon sang decontamination room gani nagapangayo ini sang pasaylo.
Suno pa kay Dr. Cerrada natabo ang insidente, samtang nagapreparar ang hospital sa long-overdue kag major renovation sang ila Emergency Department. Aminado ini nga may yara na sang magagmay nga improvement sa pasilidad, apang kinahanglan sa gihapon ang comprehensive overhaul.
May angut diri, ginapahibalo sang regional hospital nga ang ila full upgrade ang natalana na sa Agosto 2025 kag ginalauman nga magalawig sang tatlo ka bulan kag gin-aprubahan na sang Department of Health ang ila permit to construct.
Nag-coordinate naman ang CLMMRH sa iban pa nga hospitals sa Bacolod kag local officials agud mapasiguro nga magapadayon ang emergency care samtang ginapatigayon ang upgrading kag renovation sang regional hospital.