Isa ka pinasahi naman nga butang ang nag-uso kag nagalapta subong sa China kun sa diin ang mga wala sang trabaho nga pamatan-on ang nagabayad sa mga peke nga kumpanya agud magpakuno-kuno nga naga-obra sa mga gina-rentahan lang nga opisina, bisan pa wala sila sang may ginabaton nga sweldo. Libo-libo ka mga tawo sa China ang naga-report sa ila trabaho adlaw-adlaw, pero samtang ang kadam-an nagaobra kag ginabayaran, may iban nga kabataan nga sila pa mismo ang nagabayad sa mga peke nga kumpanya para lang magpakuno-kuno nga nagaobra sila didto. Sa bayad nga nagalab-ot sa 30 tubtob 50 yuan kada adlaw (mga ₱250-₱400), ang mga “espesyal” nga kumpanya ang naga-offer sang tyansa sa bisan sin-o nga maeksperyensyahan ang “working environment,” kompleto sa lamesa, lunch facilities, kag libre nga Wi-Fi. Ang iban nga “kliyente” ginapasulod lang agud magpahuway sa lugar, pero para sa mga gusto sang mas realistic nga eksperyensya, pwede sila magbayad sing dugang para sa peke nga trabaho, peke nga manager, kag bisan pa fake employee rebellions. Ini ang ginatawag nga “pretend-to-work companies” nagadamo subong nga tuig bangud sang nagataas nga demand sang mga kabataan nga wala trabaho. Pero ngaa bala may gusto magbayad agud magpakuno-kuno lang nga nagatrabaho? Wala sing isa lang ka sabat sini. Suno sa Spanish newspaper nga El País, nagpangusisa sila kag nagbisita mismo sa isa sa mga peke nga opisina agud hibaluon kon ngaa ginadagsa ini. Ang iban sa ila mga “empleyado” nagsiling nga interesado lang sila sa konsepto, samtang ang iban nagasiling nga nami lang nga may lugar sila para makapahuway nga barato kag indi lang pirmi sa balay. May mga iban man nga nagalaum nga bangud sa sini nga eksperyensya, basi makakita sila sang matuod-tuod nga trabaho sa palaabuton. Suno sa isa ka content creator nga si Xu Lin, bisan may iban nga gusto gid mag-pretend nga nagaobra, kadam-an sa ila ang ara lang sa lugar bagud sang manami nga experience. Sang Marso, naglab-ot sa 16.5% ang youth unemployment rate sa mga naga-edad 16 tubtob 24 anyos (indi lakip ang mga estudyante), kag 7.2% naman sa mga naga-edad 25 tubtob 29. Tungod man sini kag sang barato office space sa mga daku nga ciudad pareho sang Beijing, nagluntad ang ini nga klase sang pinasahi nga uso.
