Nakit-an sang isa ka residente ang isa ka bag-ong bun-ag nga lapsag sa isa ka depasahe nga jeep sa Barangay Zone 8, ciudad sang Talisay, pasado alas-7:30 kagab-i, Hunyo 8, 2025.
Sa interview sang DYHB kay Talisay City Social Welfare and Development Office Head, Dionela Madrona, ginpahayag sini nga base sa nakakita, nabatian sini ang hilibion sang isa ka bata gikan sa nakapark nga jeep, kag sa iya pagpalapit, nasapwan sini ang naputos sa lampin nga lapsag nga yara sa sulod sang karton.
Gilayon naman ini nga ginpadangat sang nakakita sa mga opisyales sang barangay kag madasig man nga nagpakig-angot ang barangay sa mga katapo sang City Disaster Risk Reduction and Management Office kag sa City Social Welfare and Development Office kun sa diin nakalab-ot kay Madrona ang impormasyon.
Kasunod sini, gilayon nga gindala ang lapsag sa city health office kag ginhatagan sang nagakaigo nga pagtamod.
Suno kay Madrona, posible nga wala sa ospital ginbun-ag ang lapsag bangud yara ang umbilical cord kag nagka-infection rasun nga ginhatagan ini sang antibiotic kag ginpaidalum sa blood test.
Sa pagreview sang CCTV sa lugar, may isa ka lalaki ang nagbilin sa lapsag sa nasambit jeep kag ginbalikan pa sini agud habulan.
Magapatigayon man survey ang CSWDO sa lugar kag magapamangkot kun sin-o ang mga nagabusong sa sa lugar apang ginalantaw man ang posibilidad nga ginbilin lamang sa lugar ang lapsag kag indi residente sang lugar ang mga ginikanan sini.
Sa karon, padayun nga gina-monitor ang lapsag kag ginahatagan sang nagakaigo nga test samtang ginaproseso ang mga papeles sini.
[Photo Screenshot from CCTV Footage]