Isa ka pinasahi nga inisyatibo ang nag-viral karon sa social media sa diin ginapatihan, ini ang mangin sabat sa mas matawhay nga selebrasyon sang mga kapistahan. Magabaton sang P10,000 nga cash reward ang sin o man nga makatudlo sa mga naga-eskandalo sa mga kapisthan sa banwa sang Toboso. Gintanyag ni incoming Mayor Richard Jaojoco ang nasambit nga reward sa mga makahatag impormasyon sa kun sin-o ang imbolbado sa mga pagmina-oy sa mga kapistahan. Magluwas sini, pasakaan na man sang kaso nga alarm and scandal ang madakpan nga suspetsado. Tinalikdan lang nga adlaw, isa ka lalaki ang nakabaton sang P10,000 cash reward matapos sini gintudlo ang lalaki nga nag-maoy kag nanghaboy sang mga botelya kag lamisa sa isa ka fiesta sa Brgy. Poblacion tinalikdan nga Hunyo 4. Sa nahibaluan, sini nga Hunyo 11 tubtob 13, 2025 ang fiesta sa banwa. Pinaagi sini, nagapati si Jaojoco nga mas maga-enjoy sa kapistahan ang mga tawo nga wala sang may ginapinsar nga kinagamo.
