Aminado si Bacolod City Committee Chair on Education Chairman Al Victor Espino nga sala ang ila pagpasalig sa mga ginikanan kag estudyante natuhoy sa schedule sang pagpanagtag sang school supply.
madumduman nga una na ginpahayag ni Espino nga madelatar gamay ang pagpanagtag sang libre nga school supplies sa mga estudyante sa public elementary scools sa ciudad bangud sang bag-o ginpatuman nga procurement law.
Ang delay sa pagbakal school supplies amo ang bangud sang implementasyon sang Republic Act (RA) No. 12009 ukon ang New Government Procurement Act nga nag-umpisa sang 2024.
Ang kni nga layi ang tuyo i-modernisa kag pasimplehon ang sistema sang procurement sang gobyerno kag naga-revise sang RA 9184 ukon Government Procurement Reform Act.
Pahayag sang konsehal nga ila na ini ginahikutar sa karon. Mayo 14, sang gin-submit na ang mga dokumento para sa bidding sa Bids and Awards Committee (BAC) agud masugdan na ang procurement process.”
Dugang sini nga isa sa mga nagapanguna nga isyu amo ang implementasyon sang Implementing Rules and Regulations (IRR) sang RA 12009, nga nagtuga wala ginalauman nga delay.
Natalana nga magapakighinun-anon si Espino upod ang Local School Board (LSB) sa ila meeting subong nga adlaw, Hunyo 10.
Ang programa sang libre nga gamit eskwela sang siyudad ginamando sang City Ordinance No. 09-16-787, nga naga-alokar sang P15 million nga annual budget para sa pagpanagtag sang mga bag kag gamit sa mga estudyante sa public elementary schools.
Subong nga tuig, ginpataasan sang ciudad ang pondo nga gin-allocate sa P32 million bangud sang pagsaka sang presyo sang mga school supplies. Ang Special Education Fund (SEF) amo ang nagdugang sang pondo agud masuportahan ang nasambit nga programa.