PROVINCIAL CAPITOL – Ginalantaw sang Department of Education Negros Occidental Division ang pagtaas sang numero sang mga estudyante nga magapa-enroll para sa maabot nga School Year 2025 to 2026.
Ginpahayag ni Ian Arnold Arnaez, spokesperson sang Provincial Schools Division, nga kapin 1,500 ka mga enrollees ang ila ginalauman nga magadugang sa mga eskwelahan nga sakop sang ila jurisdiction.
Nahibaluan nga ang tanan nga ciudad sa probinsiya ang may kaugalingon nga schools division magluwas sa Talisay City nga yara naman sa idalom sang Negros Occidental Schools Division upod sa mga kabanwahanan.
Sang nagligad nga tuig, nagdangat sa 324,000 ang mga nagpa-enroll sa idalom sang DepEd Negros Occidental.
Samtang, ginakabig naman ni Arnaez nga madinalag-on ang pagsugod sang pagpanghanda sang mga eskwelahan para sa natalana nga pagbukas sang klase sa Lunes, Hunyo 16.
Ang kick-off sang Provincial Schools Division ang ginhiwat sa Binalbagan National High School samtang may ginhiwat man nga programa sa tagsa ka mga eskwelahan.
Kadungan sini ang enrollment period nga gintalana sa Hunyo 9 tubtob 13.*DYHB File Photo