BACOLOD CITY- Ginpanginwala sang iloy sang bangkay nga nasapwan sa Bangga Yap brgy. Alangilan sa ciudad sang Bacolod, nga imbolbado sa transaksyon sang illegal nga droga ang bata sini.
Ang biktima ang ginkilala nga si Christian Bawang, 27-anyos, residente sang Brgy. Estefania sa amo nga ciudad.
Ginpahayag sang iloy sang biktima, kapin las-5 sang hapon sang Hunyo 8, nagbiya sa ila nga balay si Christian agod ubrahon ang gina-edit nga graphics sa balay sang iya abyan sa Purok Pag-asa, Brgy. Estefania.
Ulihi nga nakita ang biktima kapin las-9 sang amo nga gab-i nga nagsakay sa pribado nga salakyan nga nagaduag gray, kun sa diin kaangay nga kilala niya ang sakay diri, suno sa nakakita kay Christian.
Nagapati ang iloy nga planted sa bulsa sang iya bata ang narekober nga lima ka sachet sang ginapatihan shabu.
Angot naman sa nakasulat sa karton nga gintabon sa bangkay nga “Winston Bawang kaw dason, pusher” suno sa iloy ni Christian, si Winston ang amay sang biktima.
Aminado ang iloy nga ang bana niya ang nagagamit sang illegal nga droga apang wala na ini nagabaligya bangod nakaagi ini preso sadto.
Sa karun, ginatugyan sang pamilya ni Christian sa kapulisan ang imbestigasyon angot sa kamatayon sini.