Natalana nga ipatukod ang kapin P25M nga balor sang Sagay City Component Police Station sa New Sagay Public Market, Brgy. Poblacion II.
Ini ang matapos nga ginpatigayon ang groundbreaking rites subong nga adlaw, Hunyo 9 nga ginpangunahan sang Police Regional Office-Negros Island Region kag City Government sang Sagay.
Nagtambong diri sanday PRO-NIR Deputy Director for Administration PCol. Dennis Esguerra; Negros Occidental 2nd District Rep. Alfredo Marañon, III; Mayor Narciso Javelosa, Jr; Sagay Police Chief PLtCol. Alvimar Flores kaupod ang mga city councilors kag uniformed personnel.
Ang nasambit nga Sagay CCPS Standard Building igapahamtang sa gindonar nga duta nga nagatakos sang 1,500-square-meter.
Ini ang mangin two-storey building kag may pasilidad kasubong sang office spaces, quarters, detention cells, conference rooms kag iban pa.
Suno kay Mayor Javelosa, ang proyekto ang isa ka daku nga tikang para sa mga Sagaynon nga gin-formalized sadtong 2019.
Nagapati man ini nga ang pagpatukod sang amo nga police building ang magabulig sa padayun nga pagpasangkad sang community services kag pag-isa sang kapulisan kag kumonidad.
Ang kapin P25M nga building gikan sa national government ang ginalauman matapos sa Hunyo 9, 2026.
| Via Sagay City Government