Ginpatigayon subong nga adlaw, Hunyo 9 ang blessing kag turnover sang information and communications technology (ICT) equipment lakip na ang isa ka police vehicle sa nagkalain-lain nga units sang Police Regional Office 6.
Ini ang ginhiwat sa Camp General Martin Teofilo B. Delgado, Fort San Pedro, Iloilo City nga ginpangunahan ni Police Regional Office 6, Regional Director, Police Brigadier General Jack L. Wanky.
Ang mga units sa idalum sang PRO-6 ang nagbaton sang kabug-usan nga 226 desktop computer sets, siyam ka tablets, kag isa ka 4×4 personnel carrier pick-up agud pagbulig sa pagpasangkad sang operational efficiency kag administrative capability sang mga police offices sa rehiyon.
Base sa report sang PRO-6, isa ka desktop computer set kag isa ka tablet ang ginbaton sang PRO-6 Regional Headquarters samtang 23 ka desktop computer sets kag isa ka tablet ang ginbaton sang Police Provincial Office sang Aklan, Antique, Capiz kag Bacolod City Police Office.
Samtang, 8 naman ka desktop computer sets kag isa ka tablet para sa Guimaras Police Provincial Office; 15 ka desktop computer sets sa Iloilo City Police Office; kag pareha nga nakabaton sang 55 desktop computer sets kag isa ka tablet ang Iloilo kag Negros Occidental Police Provincial Office.
Dugang pa, nagbaton naman sang tag-isa ka 4×4 personnel carrier pick-up ang Leganes Municipal Police Station kag Iloilo Police Provincial Office.
Pahanumdom ni Wangky sa mga kapulisan, gamiton ang mga kagamitan suno sa ila nagakaigo nga paggamit, halungan kag mangin responsable sa mga ginakabig government properties.
[Photo from PRO-6]