May mga tawo nga ginakulbaan magsakay sa eroplano bangud nga hawa ini kag kun kaisa banhud man sang turbulence sa kahawaan. Pero paano kun manog hugpa nalang gid ang eroplano, nagka problema pa? Pila ka mga pasahero sang eroplano sang American Airlines ang napilitan nga magsakay sa bus, 225 kilometers nagikan sa ila orihinal nga destinasyon bangud nga tuman ka dako ang eroplano para sa airport. Suno sa report, nagbiya ang eroplano sa Philadelphia sang Hunyo 2, las-7:42 sang gab-i sakay ang 231 ka mga pasahero kag 11 ka crew members. Ini ang dapat nga maghugpa sa Naples las-10 sang aga pagkasunod nga adlaw. Apang ang Boeing 787-9 Dreamliner ang hinali lang nga naglain sang ruta sang yara na sa tunga-tunga sang Naples kag Rome. Base sa report, hinali nga nagliso ang eroplano sa Tyrrhenian Sea nga west sang Italian mainland. Yara ini sa ginabulubanta 112 kilometers nagikan sa Naples International Airport antes nagliso sa Rome Fiumicino Airport. Sang nakahugpa na sa Rome Fiumicino Airport, ginkarga ang mga pasahero sa bus padulong sa Naples nga may kalayu-on nga tatlo ka oras nga byahe. Sa isa ka statement nga ginpagwa sa US media, ginpahayag sang American Airlines nga kinahanglan nga mag-divert sa Rome bangud sang “operational limitations.” Kun basehan naman ang historical flight data, gin-report nga na-andan na sang American Airlines nga maglupad sa Naples sa ila Boeing 787-8 Dreamliner nga 20 feet nga mas magamay kun ipa-anggid sa 787-9 kag may pasahero nga mas manubo sang 48.
