BACOLOD CITY- Nagtaliwan sa ospital ang iloy nga nabungguan sang motorsiklo malapit sa ospital sa dalan Araneta sa bahin sang Barangay Pahanocoy sa ciudad sang Bacolod, pasado la-una sang hapon, Miyerkules, Hunyo 11.
Ang nagtaliwan ang ginkilala nga si alias “Ruth”, 40-anyos, residente sang amo nga barangay.
Samtang ang driver sang motorsiklo nga nakabunggo sa biktima ang ginkilala nga si alias “Chris”, 20-anyos, upod ang backrider sini nga si alias “Jo”, 20-anyos, nga pareho residente sang Brgy. Tangub.
Base sa pahayag ni PEMS Rodney Tiana sang Traffic Management Unit, ginbawian sang kabuhi sa ospital ang biktima tuga sa patal nga pilas nga naagom.
Madumduman, gina-alegar nga madasig ang pagpadalagan sang motorsiklo nga naga-usoy sa direksyon nga sur padulong norte, sang aksidente nga nabungguan sini ang iloy nga nagatabok upod ang iya bata padulong east nga direksyon.
Luwas sa katalagman ang menor de edad nga upod sang biktima, samtang nagapabilin sa ospital ang driver kag backrider sang motorsiklo bangod sa naagom nga pilas tuga sang aksidente.
Dugang ni Tiana, desidido ang pamilya ni Ruth nga magfile sang kaso nga Reckless Imprudence Resulting to Homicide batok kay Chris.