WORLD NEWS- Nautas ang kabuhi sang 49 ka tawo matapos ang pagbaha kag landslide nga nagluntad sa Eastern Cape province sa South Africa. Suno kay Eastern Cape Premier Lubabalo Oscar Mabuyane, nalakip sa mga nagtaliwan ang apat ka bata, isa ka driver, conductor sang school minibus nga gin-anod sang baha malapit sa Mthatha. Apat pa ka mga estudyante ang padayon nga ginapangita samtang tatlo ang naluwas. Ginalauman nga magataas pa ang death toll sa amo nga insidente bangod padayon ang search and rescue operation sa lugar. Base sa opisyal, madamo sang komunidad ang lubog sa baha, kag ginatos ka pamilya ang nagapabilin sa evacuation center. Ginpahayag ni South African President Cyril Ramaphosa padayon nga nagapalab-ot sang bulig ang National Disaster Management Centre sa amo nga krisis.
