PROVINCIAL CAPITOL – Gintugutan na nga makapauli ang 255 ka mga pamilya ukon 887 ka mga indibidwal gikan sa mga eskwelahan sa La Carlota City nga ginhimo nga evacuation centers sang maglupok ang Bulkan Kanlaon.
Ang ginpapauli nga mga IDPs ang nagapuyo sa saguwa sang six-kilometer radius extended danger zone nga ginalakipan sang mga sitio sang Nailab, Tinin-awan, Gama, kag Mansibanga sa Barangay Ara-al; Sitio Jamindang sa Barangay Haguimit; kag mga sitio sang Labinsawan, Bais, kag Batacon sa Barangay Yubo.
Malapit anom ka bulan nga nagtiner ang mga ini sa City Evacuation Center, La Carlota South Elementary School II (South II), La Carlota North Elementary School (LCNES), kag La Carlota City College-Cubay Campus.
Nahibaluan nga ang pagpapauli sa mga IDPs ang kasunod sang rekomendasyon sang City Disaster Risk Reduction and Management Council sa ginhiwat nga meeting sadtong Hunyo 10 agud mabakante na ang mga eskwelahan para magamit na ang mga classrooms sa nagahilapit nga pagbukas sang klase sa Hunyo 16, Lunes.
Sa pihak sini, may 64 ka mga pamilya ukon 232 ka mga indibidwal nga nagapuyo sa sulod sang 6KM EDZ nga temporaryo nga igasaylo sa City Evacuation Center kag City Gymnasium 1 bangud hugot nga ginadumili ang anuman nga human activity sa sulod sang danger zone.
Padayon naman nga maga-monitor kag magahatag sang suporta ang local nga otoridad sa sitwasyon samtang nagagiya sa pagbalik sang mga magapauli nga mga pamilya sa ila tagsa ka komunidad.
[Photos by Myla Carlota]