PROVINCIAL CAPITOL – Ginalantaw sang Department of Education nga magalab-ot sa ginabanta 1.3 million ang mga estudyante sa elementary kag high school nga magapa-enrol sa bug-os nga Negros Island Region para sa school year 2025 to 2026.
Ginpahayag ni DepEd NIR Director Ramir Uytico nga sa pihak nga nagsugod na ang klase sa public elementary kag high schools, magabaton sa gihapon sang enrolment ang mga eskwelahan tubtob sa bulan sang Agosto.
Posible nga sa Byernes pa makapaguwa sang quick count ang DepEd sa numero sang mga enrolees bangud naga-coordinate pa sila sa DepEd Region 6 kag Region 7 angot diri.
Samtang, ginpasiguro naman ni Director Uytico nga hugot sila nga nagabantay sa pagbukas sang klase paagi sa Oplan Balik Eskwela.*Capitol PIO Photo