BACOLOD CITY- Pilason ang duha ka tawo matapos nga gina-alegar nagtiruhay, pasado las-7 kagab-i, Hunyo 16, sa isa ka subdivision sa Barangay Mansilingan sa ciudad sang Bacolod.
Ang mga imbolado sa gina-alegar pagpangluthang amo si alias “Weny”, 38-anyos, tricycle driver; kag alias Loreto, 48-anyos, mamumugon, kag residente sa amo nga barangay.
Ginpahayag ni Police Station 7 Commander Police Captain Dax Santillan, pag-abot sa crime scene, narekober sang kapulisan ang kapin lima ka basiyo sang bala sang ginapatihan 9mm pistol.
Samtang sa pagpadulong sang kapulisan sa ospital, nagtudluanay sanday Weny kag Loreto kun sin-o sa ila duha ang may kahimuan sa krimen kag wala sang may maako kun sin-o ang suspetsado sa ila sa pagpangluthang.
Nakaagom sang pilas sa tiyan si Weny, samtang pilas naman sa dughan kag kamot ang naagom ni Loreto.
Suno kay Santillan, daan nga hiligut-anon tuga sang utang ang possible nangin motibo sa krimen.
Wala naman sang may narekober nga armas luthang sa crime scene, rason nga padayon ang imbestigasyon sang Police Station 7 angot sa amo nga insidete.
Plano ni Santillan nga ipaidalom sa paraffin test ang duha, apang impossible pa sa karun bangod nagapabilin pa ang mga ini sa ospital.