Nagpagwa sang pormal nga pahayag si Portia Familiaran agud klaruhon ang isyu may kaangtanan sa mga tawo sini nga ginaalegar iligal nga nagpangbunot kag nangkuha sang mga tanum sa palibot sang Bacolod City Government Center (BCGC).
Madumduman nga una na ginpa-blotter sang isa ka Building Administrator sang BCGC nga si Alyas Kate sa Police Station 4 ang pagpangkuha sang tanom sang pila ka mga kalalakinhan nga nagpakilala nga mga tawo ni Familiaran.
Nakasaad sa blotter report nga wala man gani sang may ginauyatan nga clearance ang nga lalaki nga nagatugot sa ila manggabot sang tanom nga Philodendron sa palibot sang façade sang BCGC.
Bangud sini, pila ka mga opisyal sang ciudad ang nagpanawagan man sang imbestigasyon kag posible nga pagpasaka sang kaso batok sa mga imbolbado.
Ginklaro ni Familiaran nga siya ang nagapanag-iya sang mga tanum kag landscaping materials nga makita sa palibot sang BCGC. Iya ini personal nga gingastuha kag wala sang may ginpangayo nga pondo halin sa ciudad.
Dugang pa sini nga nagkuha gani ini sang pribado nga hardinero para sa pagtanum kag pag-maintain sang area.
Suno pa kay Familiaran nga January 2023 sang gintuyo ni Mayor Albee Benitez nga patahumon ang palibot sang BCGC sa diin ginpahibalo sang iya bana nga si Vice Mayor El Cid Familiaran si Benitez nga may plant collection si Portia.
Sunod sini, nagpakig-angut sa iya ang Executive Assistant ni Mayor Albee kag nagpahayag nga gusto siya maistorya sang alkalde.
Sa ila nga paghinun-anon ni Benitez, didto nag-offer sa iya ang alkalde nga pamunuan sini ang “Clean and Green Program” apang nagpamalibad ini bangud sang health reasons.
Pero nag-volunteer man ini nga siya na ang bahala sa landscaping kag beautification sang BCGC grounds.
Bisan pa nga iya ginbalibaran ang pormal nga posisyon bangud sang personal nga rason, boluntaryo siya nga nagpasugot nga manguna sa landscaping.
Pagkatapos sang nasambit nga pag-istoryahanay ni Familiaran kag Benitez, gilayon sini nga ginhikot ang proyekto, nagbakal ini sang mga bato halin sa Mambukal kag iban pa nga tanum nga siya mismo ang nagpili. Suno kay Familiaran, masami pa gani sadto nga ginabisita ni Mayor Albee ang mga pananom kag gindayaw ang progress sang proyekto.
Sa sulod sang tatlo ka tuig, siya mismo ang nagpadayon sang pag-atipan, lakip ang pagpamunyag, pag-abuno kag pag-ilis sang mga damaged nga tanom sa bulig sang mga staff sang Vice Mayor’s Office.
June 12,2025 sang na-schedule ang replacement sang mga laya kag tigulang na nga mga tanom.
Ang iban nga buhi pa nga tanum ginbalhin lang sa iban nga lugar bilang kabahin sang ila routine maintenance.
Dugang pa sini nga iya kun tani intensyon nga padayunon ang iya nasugdan apisar magatakop na ang term sang iya bana .
Ang ini nga mga akusasyon suno kay Familiaran ang may “political motivation” para higkuan ang iya pangalan.