NEGROS ISLAND REGION- Nagpasalig si Police Regional Office- Negros Island Region (PRO-NIR) Director Police Brigadier General Arnold Thomas Ibay nga maga-comply sa Five-Minute Response Time policy ang mga katapo sang kapulisan sa rehiyon, ini base sa mando ni Philippine National Police (PNP) Chief Police General Nicolas Torre III.
Ginpahayag ni PBGen. Ibay, pagatingwaan sang kapulisan nga yara sa idalom sang PRO-NIR nga makaresponde sa sulod sang lima ka minuto matapos mabatunan nga tawag nagikan sa pumuluyo nga nagapangayo sang assistance ukon bulig.
Luyag man sang PRO-NIR Director nga malab-ot ang standard nga ginhatag ni PNP Chief, para ipatuman ang people-centered approach, mas mapasanyog ang presensya sang kapulisan pinaagi sa pagpatrolya, kag mangin aktibo sa pag-responde.
Madumduman, walo ka hepe nga nadesignar sa Navotas, Caloocan, Valenzuela, Mandaluyong, Marikina, San Juan, Parañaque, kag Makati, ang ginkakas sa pwesto bangod napaslawan nga magpatuman sang amo nga polisiya.