PROVINCIAL CAPITOL – Nagapabilin nga hilway sa balatian nga Monkeypox ukon Mpox ang probinsiya sang Negros Occidental.
Ginpahayag ni Provincial Health Officer Dr. Girlie Pinongan, ang isa ka suspected case sa probinsiya ang nag-negatibo sa ginpatigayon nga laboratory test.
Ginklaro man sini nga ang pasyente nga nag-positibo kag ginabulong karon sa regional hospital ang gin-refer sang Bacolod City Health Office kag indi sang PHO.
Pahanumdom ni Dr. Pinongan, sa pihak nga makalalaton ang Mpox, sarang ini nga malikawan paagi sa good hygiene kaangay sang regular nga pagpanghinaw sang kamot kag paglikaw sa mga indibidwal nga may mga skin rashes kag may flu-like symptoms.
Ginapanugyanan man sang provincial health officer ang mga pumuluyo nga nagabatyag sang mga sintomas sang Mpox nga gilayon magpakonsulta sa doctor agud mahatagan sang nagakaigo nga pagbulong.