PROVINCIAL CAPITOL – Padayon nga nagapangita ang Provincial Government sang Negros Occidental sang lote nga pahamtangan sang permanent relocation site sang mga pumuluyo sa banwa sang La Castellana nga nagaistar sa sulod sang danger zone sang Bulkan Kanlaon.
Ginpahayag ni Governor Bong Lacson nga may duha ka propyedad sa Barangay Talaptap nga ila gina-negosyar sa mga tag-iya agud nga baklon apang sa bahin sang value sang duta, suno kay Lacson, “there might be a problem”.
Suno kay Lacson, indi sila basta na lang nga magpasugot sa presyo nga gintanyag sang tag-iya kag sa baylo, kinahanglan nga may yara sang basehan sa value sang duta kag magaagi ini sa isa ka komitiba nga amo ang maga-desisyon.
Sa karon, pila sa mga evacuees, particular ang mga taga-Barangay Cabagnaan, ang ginapahamtangan sang temporary relocation site sa Barangay Mansalanao kun sa diin nagpadala sang shelter tents ang Office of the Civil Defense agud istaran sang mga ini.
Aminado ang gobernador nga daku nga pagpanghangkat sa mga evacuees ang maulanon nga panahon rason nga nagapangita sila sang permanente nga sayluhan sang mga ini.