Natalana nga patigayunon ang highlights sa selebrasyon sang MassKara Festival sa ciudad sang Bacolod sa ika-tatlo nga domingo sang Oktubre sumugod subong nga tuig.
Ini ang sandig sa City Ordinance No. 09-17-820 nga gin-amend sang Sangguniang Panlungsod pinaagi sa Resolution No. 249, Series of 2025.
Nahibaluan nga ang orihinal nga petsa sang Masskara Festival highlight ang ginapatigayon sa ika-apat nga Domingo sa bulan sang Oktubre apang base sa obserbasyon sang mga opisyales sang ciudad, masami nga gina-ulan ang amo nga mga inadlaw.
Madumduman nga una na ginpahayag ni Chairperson sang Committee on Tourism nga si Councilor Jason Villarosa nga paga-amyendahan ang ordinasa natuhoy sa petsa nga natalana para sa highlight kapiestahan kasunod sang na-eksperensyahan nga pag-inulan tinalikdan nga tuig.
Kasunod sini, gin-anunsyar sang ciudad nga patigayunon ang highlights sang selebrasyon subong nga tuig sa maabot nga Oktubre 19.
Nahibaluan nga ang Masskara Festival ang ginakabig pinakadako nga selebrasyon sa ciudad sang Bacolod nga nagapakita kag nagapresentar sang bugana nga kultura kag kinaiya sang mga Bacolodnon.
Ini man ang nagapakita kag nagasimbolo sang kapag-on kag kabakod sang mga pumuluyo nga nagapadayun nga nagayuhom sa piyak sang kabudlayan kag pagpanghangkat.