Wala nakitaan sang ano man nga problema ang mga dokumento nga gin-turnover sang transition team ni Outgoing Mayor Albee Benitez kag Incoming Mayor Greg Gastataya sa natabo nga Local Governance Transition Team Turn Over Ceremony kahapon, June 20,2025 sa Bacolod City Government Center.
Sa interview sang DYHB sa head sang transition team ni Mayor-elect Gasataya nga si Atty. Mark Steven Mayo, ginpahayag sini nga “seamless” ukon nangin matawhay lang ang ila turn-over upod sang City Legal Office kahapon.
Suno kay Atty. Mayo, ila maid-id nga gin-check ang mga dokumento may angut sa annual budget, investment plan, list of personnel kag inventory of assets, contracts and obligations.
Sa pihak nga bahin, una na ginpahayag ni Department of Interior and Local Government (DILG) City Director Christian Nagaynay nga halos tanan nga mga dokumento sa idalom sang administrasyon ni Benitez ang natigayon nga naturn-over kahapon.
Isa sa mga nakita nga rason kun ngaa nangin masulhay ang turnover kahapon amo bangud nga nagcomply ang mga department heads kag opisina sa mga gin-request nga mga dokumento sang transition team.
Ang amo nga turn-over ang preparasyon man sa patigayunon nga executive briefing.
Dugang pa ni Mayo, may pila pa sa mga dokumento kaangay sang assessment report sang Seal of Good Local Governance (SGLG), kag Commission on Audit (COA) nga natalana nga igasubmit sa nasambit nga executive briefing.