Tubtob Hunyo 26 na lang ang pagbaligya sang Bacolod City Government paagi sa City Cooperative and Livelihood Development Office (CCLDO) sa ₱20 kada kilo nga bugas sa mga residente sa ciudad.
Suno kay Brenda Burdeos, Project Development Officer IV sang CCLDO, may nakaschedule na sila nga petsa sa pagbaligya sang bugas nga kun diin Hunyo 26 ang posible nga pinakaulihi nga adlaw sini.
Ginpahayag sini nga naka-deliver na ang National Food Authority sang kapin 5,600 ka sako sang bugas sa Bacolod.
Yara naman sa 4,449 ka sako sang bugas ang nabaligya na sang city government.
Sa karon, 39 na ka mga barangay ang nabaligyaan sang ₱20 kada kilo nga bugas nga kun diin 24 sa ini ang numbered barangay kag 15 naman ang named barangay.
Subong nga adlaw, magabaligya ang city government sa Barangay Punta Taytay, Barangay 19, Barangay 23, Barangay 27, kag Barangay 10.
Ang city government nagbakal sang 5,800 ka sako sang bugas sa NFA kag plano liwat sini nga magbakal kun maubos na nga mabaligya ang mga bugas nga una ginbakal.