Padayun nga nagadul-ong sang bulig ang mga katapo sang Philippine Red Cross (PRC) sa mga pumuluyo nga padayun nga apektado sang paglupok kag aktibidad sang Bulkan Kanlaon.
Base sa isa ka press release nga ginpagwa sang PRC, as of June 16 nagdangat na sa 29,195 ka mga indibidwal ang nalab-ot sang Red Cross kag naka-distribute sang mga food packs, kitchen sets, mga habol, mosquito nets, facemask kag pila pa ka mga pagkabutang nga makabulig sa mga apektado.
Padayun man nagaserbisyo ang mga water stations, 59 ka first aid stations kag 104 ka mga welfare desks.
Dugang pa diri ang pagpatigayon sang hygiene promotions, health consultations, health promotion sessions, psychological first aid, child-friendly activities, kag clearing operations.
Suno kay PRC Secretary-General Dr. Gwen Pang, magapadayun nga magamonitor ang mga katapo sang
Red Cross kag volunteers kag padayun nga magahatag sang suporta sa mga apektado sa probinsya sang Negros kag kaiping nga mga lugar.
Nagapanugyan man ang Philippine Red Cross sa mga pumuluyo ilabi na sa mga residente nahamtang malapit sa bulkan nga padayun nga mangin alerto kag vigilante sa palibot kag magsunod sa mga pagsulundan nga ginapatuman sang mga otoridad.