PROVINCIAL CAPITOL – Ginsugdan na subong nga adlaw ang pagbaligya sang tag-P20 kada kilo nga bugas sa idalom sang partnership sang Provincial Government sang Negros Occidental kag Federation of Irrigators Association Central Negros-Bago River Irrigation System (FIACN-BRIS).
Una ini ginpatuman sa banwa sang Pulupandan kun sa diin 500 ka mga indibidwal nga makabig kabahin sang vulnerable sector kaangay sang PWDs, senior citizens, solo parents kag 4Ps beneficiaries ang nakabakal.
Ginpahayag ni FIACN-BRIS President Pedro Limpangog nga kabug-usan nga 50 ka sako sang tag-50 kilos nga bugas ang ila nabaligya kun sa diin ang tagsa ka bumalakal ang nakadalawat sang kutob sa lima ka kilo.
Suno kay Limpangog, pagpadayon ini sang ila nga Bigasan ng Bayan apang sa baylo sang regular nga presyo nga P25 kada kilo, ginpanubuan nila ini sa P20 kada kilo agud magsantu sa programa ni Presidente Bongbong Marcos.
Ang Provincial Government sang Negros Occidental ang nagatanyag sang bulig paagi sa farm inputs sa mga mangunguma sang humay agud mangin tayuyon ang pagbaligya sang barato nga bugas.
[Photo credits to Pedro Limpangog]